Umurage n'umuvumo bya Kibaza

Menu Principal

Main Menu

Umurage n'umuvumo bya Kibaza

(Pierre Smith (éd.), Le récit populaire au Rwanda,Paris, Armand Colin:1975, pp.140-6 )

Mbacire umugani mbabambuze umugani...

Kera u Rwanda rukiri ishyamba, umugabo yaturutse mu mahanga ya kure nta mwana, mta mugaragu, ari kumwe n'mugore gusa. Ageze mu Buberuka[1] atema ishyamba, arahinga, atera imyaka, arahatura haramutunganira.Hashize iminsi abyara umwana w'umuhungu, amwita Gatwa. Uwo mwana ntiyarara hasi. Ntibyatinda, abyara undi muhungu amwita Gahutu. Ubuheture buba nanone umuhungu, amwita Gatutsi. Abo bana bakura ari nkímpanga. Mu mabyiruka, Gatutsi akabarusha ibakwe n'ubwenge, ibyo akabigerekaho ubucacuzi n'ubucakura. Umurimo yakubitagaho itako wari uwo kuragira amatungo. Gahutu we yakundaga guhinga no gufasha nyina mu mirimo y'imuhira. Ariko akagira ubwenge buke. Gatwa yigira umutesi w'aho, inda nini n'ubutesi bimutwara umutima. Nyina abakurikiza abakobwa.

Umugabo aba aho, agahinga amasaka muri Werurwe, muri Tumba agasarura utwagwingiye. Agatera ibishyimbo muri Kaboza, izuba rya Mutarama rikabyica ururabo. bukeye ati: "Ntabyo, inzara igiye kunyicana n'urubyaro kandi ntuye isambu yera. Uwatuma kuri Kimenyi[2] mu Gisaka yambwira imfura y'amezi nkajya menya igihe cy'ihinga n'icy'isarura." Inama ye imaze guhama, akoranya abahungu be arababwira ati: "Muhambire impamba nyinshi, muhaguruke mujye mu Gisaka kwa Kimenyi, mumumbarize imfura y'amezi." Gatwa niwe mukuru azavuga ubutumwa. Nawe Gahutu, Gatwa nahwisha uzamwibutse. Naho Gatutsi azabaherekeze. Nizere ko azabamara irungu mu nzira.

Abahungu bahambira impamba bashyira nzira.Barenze imisozi yaba nk'ine, Gahutu ati : "ndarembye. Nimuzane iyo mpamba tuyiryeho."Gatwa wari uyitwaye ati: "Ihangane ntiharacya."Gatutsi ati: "Ariko Gahutu ntugira inda nini. Muri iki gitondo urashaka kurya inzoka zitaranacurama?" Barakomeza baragenda. Ubwo ariko Gatwa wari wabaje inyuma, impamba yari yayimaze ku rubisi. Amanywa amaze gukamba, Gahutu na Gatutsi bahuza inama yo kurya. Gatwa aratura, barumuye inkangara, basanga irihamagara. Bagwa mu kantu. Babuze uko bagira, bikomereza urugendo. Aho basanze bakura ibijumba, Gahutu agasaba bakamuha igiterero, agashyira mu nkangara, akagenda abihekenya inzira yose,yaruha, agacana akotsa. Yasanga aho batema amasaka, agasaba amahundo, akagenda ayashishuza. Gatutsi we yirinda ibyo biryo bya Gahutu agira ngo bitaza kumugwa nabi bikamutera inzoka. Yishumika umugozi mu nda, arindira izimano rya nijoro bageze iyo bajyaga. Barakomeza baragenda, mu mataha y'inka barasohoza.

Bageze ku irembo baravunyisha, barakirwa, bafungurirwa bimaze inyota. Gatwa uko yagatumbye, akubisemo ibindi inda iratumba iba umuduri. Gahutu akubise mu mpekenya, araguganirwa ajya mu kaga, inzoka imubuza guhumeka aroha iminiho. Gatutsi abiririye mu nda yera, arushaho kumerrwa neza. Kimenyi ababaza ikibagenza. Gatwa agiye kubumbura umunwa, asanga yabyibagiye. Gahutu ati: "Umubyeyi wacu Kibaza, yadutumye kumubariza imfura y'amezi."Kimenyi aratekereza, ubwo mu mutima aribwira ati: "ibi nanjye simbizi."Asanze bimunaniye, arirarira abwira abana ati:"Nzabasubiza ejo mu gitondo, nimuhaguruke mujye kuryama, mudasinzira mukabyibagirwa."

Abana bageze ku buriri, Gatwa na Gahutu barahunira. Gatutsi yumva Kimenyi atuma ku munyabigega we, ngo ni amwitabe amubaze imfura y'amezi. Umuhungu muzima arabyuka ajya i kambere, yihisha mu gahwazi k'imfuruka, inyuma y'urusika rw'umusego.Umunyabintu ageze aho baramubaza, avuga ko imfura y'amezi ari Mutarama, kuko ariko kwezi kwa mbere k'umwaka. Byongeye kandi bakanakubibamo amasaka ariyo mbuto y'ingenzi abahinzi bita nkuyuyu ikura umukanda mu nda. Bamuha inzoga aranywa, hanyuma aritahira. Umuhungu bimujya mu gutwi, ariko aguma ahongaho, ategerejo ko baza kuryama akumva icyo umugore avugana n'umugabo we. Barashyira bararyama. Bageze ku buriri, umugore ati: "Babivuze ukuri koko izina si ryo muntu. Urinda kubaririza, ntuzi ko imfura y'amezi ari Ukwakira kwakira imbuto zose, imvura ikagwa, ibishyimbo bigaterwa, uburo bukabibwa, ibijumba bigatabirwa, inzuzi, ibikoro, n'izindi mbuto nyinshi zikamarirwa mu butaka?" Umugabo ati: "Ubanza aribyo koko", bakomeza kwiganirira kugeza igihe basinziriye. Bamaze gutsibuka, umwana arahaguruka ajya kuryama.

Bukeye Kimenyi ababeshya ko imfura y'amezi ari Mutarama. Abigira ashaka ko Kibaza atamenya igihe cy'ihinga ngo azasonze. Abana barahaguruka barataha. Bageze imuhira, umubyeyi wabo abwira Gatwa kumusohoreza ubutumwa. Gatwa ati:"Kimenyi yatubwiye ko imfura y'amezi ari Mutarama."Se arabishima. Hashize umwanya mutoya, Gatutsi yihererana se amubwira uko byagenze n'uko bakiriwe, uko Gatwa yibagiwe ubutumwa bukavugwa na Gahutu, uko Kimenyi yayobewe imfura y'amezi akabasezeranya kuzababwira mu gitondo, uko yatumije umunyabigega we rwihishwa n'uko yamubajije, ndetse n'uko umunyabigega yamusubije, uko umugore yabwiye umugabo we bageze ku buriri, uko basiganye ndetse n'icyo banzuriyeho. Asoza amubwira ko imfura y'amezi uko yabyumvise ari Ukwakira.

Se aramushima cyane.Ahamagara abahungu be bose, ababwirana umujinya uvanze n'ibyishimo, ati: "Gatutsi mugize umutware mu muryango wanjye, kuko yerekanye ubutwari bihagije. Nawe Gahutu, kuko uterekanye bihagije ko ufite icyo urusha mukuru wawe, nkuvumishije kuzakora umurimo uvunnye wo guhinga. Byongeye kandi uzabe umugaragu wa murumuna wawe, akwice cyangwa agukize uko ashaka, n'abuzukuru bawe kugeza kera, uwo muvumo ntibazawusimbuka. Gatwa, kuko ari ikijibwe bitagereranywa, azatungwe no gusega, icyo azakesha ubutaka kizabe ibumba. Urubyiruko rw'igihe cyose ruzamunene, rwaba urwa Gatutsi, rwaba urwa Gahutu, cyakora azarye iby'abo amashyengo ye azashimisha."

Umurage n'umuvumo bya Kibaza bihama uwitwa umunyarwanda wese, arema atyo ibitsina bitatu mu gihugu, umututsi agasuzugura umuhutu, umuhutu nawe akiyumvisha ko agomba kumutinya no kumuha icyubahiro. Umuryango umaze kugwira, Gatutsi aba umutware w'imbaga ya Kibaza mu nzego zose. Kibaza arema atyo mu Rwanda umushyikirano w'ubuture n'agaciro buri muntu agira mu bandi.

 

 

  1. Petite région du nord du Rwanda, à l'est du Lac Ruhondo.
  2. Nom dynastique de plusieurs rois du Gisaka, royaume rival situé au sud-est du Rwanda, et qui devait finalement être englobé par ce dernier au début du XiXème siècle. Le premier Kimenyi est présenté comme contemporain des origines historiques de la dynastie rwandaise.Son nom signifie "Celui-qui-connaît" et c'est pour cela qu'on s'adresse à lui ici.

Menu Principal

Main Menu